سوالف راس القدو: يا نمشي وره الشلاّخ.. أو هذا المنشار

البحرين اليوم – (راس القدو)

إييييه.. چدي الشّلخ والله بلاش.. ألعن أبوها من حالة!! 67% هم اللّي شاركوا في الانتخابات!! الله أكبر.. يعني أنا اللّي على حساب ساكنْ في ديرة محسوب إنها مليانة أوادم، ما شفت واحد قال إنهو رايح يرشّح.. ولا شفت حركة في الدّيرة تبيّن إنّ في غوله على الانتخابات.. ما أدري من وين جابوا هذي النسبة الشّلخة.. حتّى أم علاّوي قالت اللهَ نفسَه غضَب على هالشلخة ونزّلْ أمطار زلازل على الدّيرة، يمكن اشوي تنغسل من وسخ الكذبة العودة هذي!!

أنا صراحة تفاجأت من النسبة.. مو لأني متوقع إنّ الحكومة راح اتّكون صادقة واطّلع رقم صدق، هذا ولا في المشمش.. بس ما توقّعت توصل المواصيل إنها ترمي شلخة بهالمستوى.. 67% على ويه يا بويي، ومن وين يا حظي؟! يا إحنا صرنا مطنزة في عيون الحكومة.. يا هالحكومة خلّص الآيل منها.. حالها حال الديناصور اللي فوق راسنا أكفر من أربعين سنة…

بس أنا كلْ خوفي يطلع الرّقم صدق.. وإنّ الحكومة جابت مجنسين عدل عدل، وخلّتهم يشاركون في الانتخابات. أكّو بنتي البارحة راوتني هنود وبنغالية يشاركون في الانتخابات، عيني عينك، وهذا غير اللّي ما طلعوا في لصْور والفيديوات. هذا أكثر شي يخوّفني!! أخاف من اليوم الجاي اللي يصفّونه كلّنا في طابور وينشرون فينا نشَر مثل ما سوّه محمد بن سلمان في ذاك الصحفي. وأكّوا شرّف بكبره وجانا بعد.. يعني يا انْصدق الشّلاخ اللي عندنا ونمشي وراه، يا يمشّون علينه المنشار.. في الصاعد والنّازل.. الله يلعنها من عيشة هذي!!