سوالف راس القدو: ظروف وفد الدراز.. آه منكم يا الملاعين

البحرين اليوم – (راس القدو)

آه.. يا ويلي.. آه.. مو قادر أصدق. هذي آخرتها يا الملاعين، رايحين ليي إلى الملك خمق وكل واحد حامل ظرفه.. إلى هاذي الدرجة انكسرت فيكم الشهامة والشرف!! رحتون تبوسون الأيادي اللي قتلت أولادكم وسجنتهم وحاصرت شيخكم الوقور لين ما مرض وانعفست صحته!! والله قليل عليكم كلمة خونة وعملاء، وتستاهلون العار يركبكم إلى يوم الدين…

بس تعرفون؟! أنا مو مستغرب من اللّي صار.. إيه مو غلط! اللّي انخش ودفن روحه تحت البرنوص وخاف يقول كلمة الحق، ويش يطلع منه غير هذا؟! في ناس اتعوّدت قلة الحيا، وشايفه الجو سبْرة، لا قول ولا فعل، لا حسْ ولا همّك الله، وكلّه جمبزة في جمبزة.. أكيد راح اتْطوّل عصعصها واشّمخ عيني عينك.. ولا ننسى إنّ الجماعة اللّي احتكرت قضية أبو سامي هي بعد تتحمّل مسؤولية كل هذا.. هذي الجماعة ما عرفت تشتغل صح، وكان موتها بس إنها تطلع حاملة الكاس ولو على لاشي.. ما كان همّها تربّي الناس على الصمود.. والاخلاص والصدق.. كانت تمبي بس اتكون هي البطل.. ولو على بُطِلْ.. وهذي آخرتها..

الناس اللّي راحت تزحف إلى حمد وتتوسّل ليه عشان يقبل الرسايل والظروف.. مستحيل إيكون عندها شجاعة إنها اتسوي هذا لو إنها تعرف إنّ في عمامة أو شيخ كبير راح يستنكر عليها.. هذي سوّت اللّي سوّته لأنها اقتدت ومشيت وره أفعال وأقوال ناس كبار، وأخذت منهم الأوْكيه.. يعني مو معقولة فجأة يطلعون ناس من الدراز بهذي الوقاحة.. وهي اللي عانت واعتقلوا اولادها.. وشافت المر سنتين وأكثر.. أكيد في شي وأشخاص عطوهم التشجيع.. ولا اتقولون ليي مجبورين.. هذا لهْرار يمشي على واحد ثاني.. مو على راس القدو…