سوالف راس القدو: إضرابك فضحنا يا ولدي.. فضحنا عدل

البحرين اليوم – (راس القدو)

الولد صار ليه قريب شهر وهو مضرب عن الطعام، وقضيته هي قضية حياة أو موت، والانعكليز كلهم ويّاه، نايمين ويّاه، ويكتبون ليه رسايل ويعتصمون كل ليله وكل اسبوع عند السفارة.. بس ليش مو شايف يتكلمون البحارنة عنه؟ اتّقول بنتي اللي برّه هربانين تكلموا عنه.. وسوّوا وياه تضامن مدري ويش.. بس اتّقول أغلب اللّي في البحرين صاكين بوزهم عنه.. ومشغولين بالشهايد المزورة… يعني الورق صاير عندهم أهم من الأوادم التعبانة في السجن؟! لو أنا ما أفهم ويش صاير بالضبط؟! بس إضرابك يا ولدي علي فضح الأولي والتالي.. وخلّه الكل ما يسوه عندي راس هالقدو…

أنا صراحة ما عرفت ويش يقولون في التلفون.. ساعات بنتي تراويني ويش يكتبون.. بس كل ليلة أخليها تراويني ويش صار عن ولدنا علي مشيمع.. معوّر قلبي هالولد.. وكسر خاطري يوم العيد وهو حامل بنته.. ذكرني بولدي علاوي في السجن اللي ما قدرنا انزوره لحّين….

أعرف أبو علي مشيمع من زمان.. وقعدت ويّاه وأكلت جم من مرّه.. أسمع أخباره في السجن من علاوي أو من بنتي اللي فاقعه عيونها في التلفون طول اليوم.. اذكر الايام اللّي كان أبوه يراكض عشان يهدّون الشباب.. كان يتكلم في المسجد عن كل شي، ما يعرف لا لف ولا دوران… لأنّ الرجّال مو حاسب حساب كرسي برلمان يخاف يطير منه، ولا حساب عمامة بيضه أو سوده يزعّلها او يسحبون منه البرْنص.. اللّي يشوفه حق يقوله.. رجّال سيده.. دوغري على قولة المصاروة.

اللي يقهرني هالايام، غير هاده القدو اللّي بدّه يعجّز مفلي، هم الجمبازية اللي مو راضين يركدون.. كأنه فيهم دودة إلاّه يمبون يدشون البرلمان.. يعني مو كفاية الجماعة اللّي يبولون في هافاتهم في الرفاع والحد والبسيتين.. ويهزون كل شي فيهم عشان بس يحصلون روبية أو روبيتين من الحكومة.. فوق هذا يطلعون ناس من جماعتنا على حساب.. ويقعدون يهرّون علينه وياكلون راس الفقارة بحشوتين.. بس اهم شي يدخلون هالمعبد اللي يمسونه برلمان.. الشايب فيهم الجدب باين من عيونه.. والشاب قرعته كفاية.. مو ساتره من هراره شي. ويش اقول غير مالت عليكم ومالت على اللّي بينتخبكم.. ويسكت عن جمبزتكم بنت الكلب…